२०८२ पुष ५, शनिबार ०८:०८
पुनः संचालन वा खारेज गर्ने निर्णय लिन अर्थ मन्त्रालयले सरकारी व्यवस्थापनमा रहेका जनकपुर चुरोट कारखाना लिमिटेडसहितका रुग्ण तथा बन्द रहेका चारवटा उद्योगको सम्पत्ति मूल्याङ्कनका लागि परामर्शदाता छनोट प्रक्रिया अगाडि बढाएको छ ।
मन्त्रालयले एक सूचना जारी गर्दै प्राविधिक र आर्थिक प्रस्तावको मूल्याङ्कनका आधारमा जनकपुर चुरोट कारखाना लिमिटेड र नेपाल मेटल कम्पनी लिमिटेडसहितका दुई वटा कम्पनीका लागि परामर्शदाता छानिएको जनाएको छ ।
जनकपुर चुरोट कारखाना लिमिटेडको सम्पत्ति मूल्याङ्कनका लागि एस. सुवेदी एण्ड एसोसिएट्स’ र नेपाल मेटल कम्पनी लिमिटेडको मूल्याङ्कनका लागि जीन एण्ड एसोसिएट्स छनोट भएको छ । तर, नेपाल ओरिण्ड म्याग्नेसाइट प्रालि र बुटवल धागो कारखाना लिमिटेडको मूल्याङ्कनका लागि परेका प्रस्तावहरू मध्ये कुनै पनि प्रस्तावक छनोट हुन नसकेको मन्त्रालयले जनाएको छ । यी दुई उद्योगका लागि मन्त्रालयले पुनः प्रक्रिया अघि बढाउने तयारी गरेको छ ।
मन्त्रालयले पुस ३ गतेको निर्णयअनुसार दुई उद्योगको लागि सार्वजनिक खरिद ऐन, २०६३ र सार्वजनिक खरिद नियमावली, २०६४ को व्यवस्था बमोजिम परामर्शदाता छनोट गरेको जनाएको छ । मन्त्रालयले छनोट भएका दुई परामर्शदाता कम्पनीहरू जीन एण्ड एसोसिएट्स र एस. सुवेदी एण्ड एसोसिएट्स लाई व्यावसायिक एवं आर्थिक सर्तका विषयमा वार्ता गर्न बोलाएको छ ।
मन्त्रालयका अनुसार आगामी पुस १३ गते दिउँसो २ बजे वार्ताका लागि बोलाएको छ । सरकारले लामो समयदेखि बन्द वा रुग्ण अवस्थामा रहेका यी उद्योगहरूको वास्तविक सम्पत्ति र दायित्व यकिन गर्न मूल्याङ्कन प्रक्रिया थालेको हो । यस प्रक्रियाले यी उद्योगहरूको भविष्य (निजीकरण, पुनः सञ्चालन वा खारेजी) बारे ठोस निर्णय लिन सहयोग पुग्ने अपेक्षा गरिएको छ ।
